സാമൂഹികവും സാംസ്കാരികവും രാഷ്ട്രീയവും സാമ്പത്തികവുമായ പൂർണത തേടിയുള്ള യാത്രയാണ് മനുഷ്യ ജീവിതം. വൈവിധ്യങ്ങളെ ഉൾകൊള്ളാനാകുന്ന ജനാധിപത്യബോധവും എല്ലാവരെയും തുല്യരായി കാണാനാകുന്ന സമത്വബോധവും അവകാശലംഘനങ്ങളെ ഇല്ലാതാക്കാനാകുന്ന നീതിബോധവുമുള്ള പരസ്പര സാഹോദര്യത്തോടെ വർത്തിക്കുന്ന ഒരു സമൂഹത്തിന്റെ നിർമാണമാണ് നാം വിഭാവനം ചെയ്യുന്നത്.
ജാതി വ്യവസ്ഥയുടെ ഭാഗമായുള്ള വിവേചനങ്ങളും ചൂഷണങ്ങളും വിശ്വാസത്തിന്റെ പേരിലുള്ള അടിച്ചമർത്തലുകൾ, ലിംഗവൈവിധ്യങ്ങളുടെ പേരിലുള്ള അസമത്വങ്ങൾ, സാമ്പത്തിക ഉച്ഛനീചത്വങ്ങൾ, ഭാഷാ പ്രദേശങ്ങൾ എന്നിവയുടെ പേരിലുള്ള അനീതികൾ എന്നിവ ഇന്ത്യൻ സാമൂഹികാവസ്ഥയുടെ യാഥാർത്ഥ്യങ്ങളാണ്. വിവേചനപരവും ചൂഷണാധിഷ്ഠിതവും ജനാധിപത്യ വിരുദ്ധവുമായ ഇൗ സാമൂഹികാവസ്ഥക്കെതിരായ സമരപോരാട്ടങ്ങളാൽ സമ്പന്നമാണ് നമ്മുടെ ചരിത്രം. സ്വാതന്ത്ര്യവും സമത്വവും തുല്യനീതിയും അധികാര പങ്കാളിത്വവും ആവശ്യപ്പെട്ടുകൊണ്ട് അകത്തും പുറത്തുമുള്ള അധീശത്വത്തിനെതിരെ പോരാടിയവരുടെ സ്വപ്നം ഇനിയും സാക്ഷാൽകരിക്കപ്പെട്ടിട്ടില്ല. ജനാധിപത്യത്തിലും നിയമവ്യവസ്ഥയിലും അധിഷ്ഠിതമായ രാഷ്ട്രവും ഭരണകൂടവും നിലനിൽക്കേ തന്നെ അസമത്വവും അനീതിയും വിവേചനവും ശക്തിപ്പെട്ടുകൊണ്ടിരിക്കുന്നു. സ്വാതന്ത്ര്യവും സമത്വവും പുലരുന്ന സാമൂഹിക നീതിയിലധിഷ്ഠിതമായ ഒരു ജനാധിപത്യത്തെ സൃഷ്ടിക്കാനുള്ള പ്രവർത്തനങ്ങൾ ചരിത്രപരവും അടിയന്തിരവുമായ കടമയാണെന്ന് തിരിച്ചറിയുന്നു. നമ്മുടെ വിഭാവനക്കനുസരിച്ച് ചുവടെ പറയുന്ന ആശയങ്ങളുടെ പ്രബോധനത്തിനും സംസ്ഥാപനത്തിനും സാമൂഹിക മാറ്റത്തിനായുള്ള സമര പോരാട്ടങ്ങൾക്കും സമൂഹത്തിന്റെ അവിഭാജ്യ ഘടകമായ വിദ്യാർഥി യുവജനങ്ങളുടെ കർമശേഷിയെയും സമർപണത്തെയും ഉപയോഗിക്കുകയെന്നതാണ് ഇൗ മൂവ്മെന്റിന്റെ ദൗത്യം. സാമൂഹിക നീതിക്കും പുതിയൊരു ജനാധിപത്യത്തിനും വേണ്ടിയുള്ള രാഷ്ട്രീയ ചേരിയെ കൂടുതൽ ശക്തിപ്പെടുത്തുക എന്നതാണ് മൂവ്മെന്റി്ന്റെ പ്രധാന ലക്ഷ്യം.